Fallinn, með 4,7

Við fengum afhent prófskírteini í dag. Því miður stóðumst við ekki kröfurnar sem stjórnvöld í Tyrklandi gera á hendur innflytjendum varðandi kunnáttu í tyrknesku. Ég var þó nálægt því, fékk 4,7 en þurfti að fá 5. Gerður var aðeins lægri.
Niðurstaðan  var sú sama fyrir flesta. Ætli það hafi ekki verið um 25% þátttakenda sem stóðust kröfurnar. Þannig að þetta er nú ekki alltof slæm niðurstaða að hafa verið við það að ná. En náði samt ekki og fer af stað heim á leið í fyrramálið.
Þegar ég renndi yfir prófið þá sá ég að stafsetningarvillurnar höfðu orðið mér að falli, að kunna ekki að skrifa orðin nákvæmlega rétt. Jæja, maður getur velt sér upp úr þessu endalaust, en niðurstaðan er samt á þessa lund.
Fólk brást ágætlega við. Þeir voru auðvitað ánægðir sem náðu, en hinir tóku þessu með jafnaðargeði. Ímynda mér að tungumálakennararnir bölvi þó í hljóði (þó ekki á tyrknesku, því við lærðum það ekki...).
Ég geri mér samt miklu betur grein fyrir því hvað það er mikið átak að byrja að læra nýtt tungumál frá grunni og skil betur aðstöðu þeirra sem glíma við íslenskuna. Held að það skipti mestu í þeim efnum að nálgast hvern einstakling út frá hans þörfum og kenna íslenskuna út frá hans reynsluheimi og þekkingu.
 Bestu kveðjur frá Antalya
 Einar
    

Athugasemdir

[helga (IP-tala skráð) 27.4.2006 kl. 17:04]

Leitt að heyra þó ég efist ekki augnablik um að þið hafið gert ykkar besta. Þið eruð þó reynslunni ríkari hvernig best sé að kenna innflytjendum nýtt tungumál. Góða ferð heim.

[pokinn (IP-tala skráð) 27.4.2006 kl. 17:46]

Það er líka góð reynsla að fá F. :-) í alvöru. Maður sem þekkir ekki að tapa er oftast óþolandi.
Góða ferð og góða hlé á leiðinni!