Í góðu yfirlæti á Heathrow

Þá er ferðalagið og svaðilförin hafin. Við sitjum inni í flugstöðinni á Heathrow flugvelli og látum fara  vel um okkur. Framundan er flug til Istanbúl (Miklagarðs) og þaðan til Antalya. Þar mun fara fram strangt námskeið í tyrknesku og tyrkneskum háttum og við munum fylla út dvalarleyfisumsóknir á tyrknesku og verða boðuð í viðtöl hjá tyrkneska útlendingaeftirlitinu. Við vitum samt lítið um það sem er framundan og munum án efa koma til baka reynslunni ríkari. Okkur skilst að það verði hópur Íslendinga á sömu slóðum á vegum íslenskrar ferðaskrifstofu á sama tíma, en það er nú ekki víst að við rekumst á þá. Gerður þykist betur í stakk búin að mæta álaginu sem er framundan, því að hún er þrautþjálfuð og hálærð með mastersgráðu í mannfræði og hefur auk þess upplifað að vera innflytjandi í Nicaragua. Ég hef nú ekki mikla aðlögunarhæfni sjálfur, hef þó átt tvær tengdamæður og það gekk vel að mestu leyti og svo þyki ég viðmótsþýður og viðræðugóður. Það kemur þó í ljós hver verður þrautgóður á raunastund.

Fróðleiksmoli dagsins: Marhaba þýðir góðan daginn.

kveðja

Einar (og Gerður biður að heilsa) 

Athugasemdir

[Margrét Gestsdóttir (IP-tala skráð) 23.4.2006 kl. 17:20]

Gangi ykkur vel! Verður spennandi að sjá hvort viðmótsþýða og viðræðugæði gagnast í hörðum heimi. Huggulegheit á Heathrow eru þó kannski ekki dæmigerð fyrir þá sem eru að flytjast á milli landa! Kveðja,
Margrét Gestsdóttir.