Á leiðinni

Sitjandi í flugvél á leiðinni til Bandaríkjanna, fyrirheitna landsins í þrjár vikur. Það er undarleg tilfinning.Þegar ég fór að spjalla við bandarískan sessunaut minn, barst talið fljótlega að ólöglegum innflytjendum, sem hann telur mikið vandamál í Bandaríkjunum. Hann talaði um ótrúlegan fjölda af ólöglegum innflytjendum. Það sama sá ég síðan í bíómyndinni sem var sýnd í flugvélinni. Þar var spurt hvers vegna venjulegt fólk (lesist: Bandaríkjamenn) lendi í yfirheyrslum á leið inn í landið og á sama tíma streyma hundruðir þúsunda ólöglegra innflytjenda inn í landið. Ég ætla ekki að reyna að svara því hér og nú eða velta upp frekari sjónarmiðum í tengslum við það því að í raun er það rökvilla að segja að einhver sé ólöglegur. Enginn getur verið ólöglegur í sjálfu sér, það er ekki hægt. Það eru hins vegar athafnir eða aðgerðaleysi sem getur verið ólöglegt. Í þessu tilviki er það að fólk tilkynnir ekki komu sína til yfirvalda eða framlengir ekki dvalarleyfum. Afleiðingar eru þær að fólk er óskráð inn í landið, yfirvöld vita ekki af þeim. Þannig að réttara er að tala um óskráða innflytjendur.

Kannski gefst mér tækifæri til að skoða þetta betur í ferðinni, þegar við förum í heimsóknir til hinna ýmsu stofnana sem hafa eftirlit með innflytjendum í Bandaríkjunum.

kveðja,

Einar

Kominn aftur af stað

Fyrst ég er aftur kominn af stað í ferðalag á vegum Alþjóðahússins, ákvað ég að bæta við færslum. Verð að sjá til hvað það gefst mikill tími til þess, en vonandi tekst mér að henda inn molum við og við. Ferðin verður löng eða þrjár vikur og leiðin liggur til fimm borga í Bandaríkjunum. Ég verð hluti af fimmtán manna hóp, sem kemur frá mismunandi löndum í Evrópu, en allir þátttakendur tengjast málefnum innflytjenda með einhverjum hætti. Nú sit ég hér á flugvellinum í Boston, nýkominn úr flugi með Flugleiðum og bíð eftir tengiflugi til Washington DC. Læði líka inn stuttum pistli sem ég skrifaði í flugvélinni áðan og svo kemur bara í ljós hvenær næsti pistill kemur.

 kveðja,

Einar Skúlason